أكتر حاجة واجعة دماغي بجد
الناس اللي عاوزة قال إيه ؟ ! ..... تعمل يوم وفاء لمبارك
طبعاً كل واحد حر بس بلاش نسوق قوي في حكاية هشتكنا وبشتكنا يا ريس
كل واحد لازم يبقاله إنجازات وعيوب والعاقل اللي تبقى إنجازاته أكتر من عيوبه
لكن ده ماشاء الله عليه عيوبه غطت إنجازاته بمراحل
أولاً الفساد اللي كان على أيامه الواحد ماسمعش عنه غير أيام المماليك
لأ واللي يوجع الدماغ أكتر أما يقولوا ده مهما عمل كفاية إنه بطل من أبطال حرب أكتوبر
أولاً : اللي حارب في حرب إكتوبر هما آباءنا وأعمامنا الشهدا اللي طاروا من المواقع المصرية لكن اللي بيدي الأوامر من غرفة العمليات أو غرفة التكييف فمع إحترامي لدوره .. بس اللي بيتحرك وهو شايل روحه على كفه دوره أعظم وأهم
ثانياً : هو حرب إكتوبر كلها مفيهاش غير الضربة الجوية ؟ معقول الحرب العظيمة دي إختزلت في الضربة الجوية ؟
ياريت الريس .. السابق طبعاً .. كان ضربنا إحنا وحكم إسرائيل
ثم هو عمل إيه لأبطال أ إكتوبر
محمد عبد العاطي صائد الدبابات مات بالفشل الكلوي ومكانش لاقي علاج
واحمد الهوان الشهير بجمعة الشوال برضه مش لاقي علاج
سعد الدين الشاذلي إتحبس في عهده
حفيد رفعت الجمال الشهير برأفت الهجان ماخدش الجنسية المصرية .. حفيد راجل زي ده ما ياخدش الجنسية إزاي ؟!!
والناس اللي اتظلمت في السجون وماتت في طوابير العيش والناس اللي مش لاقية علاج والناس اللي كانت بتموت في عرض البحر وخالد سعيد وسيد بلال وغيرهم والمصريين اللي كرامتهم إتهانت جوه وبره بلدهم
وبلاش نقول إنه يا حبة عيني مكانش يعرف ؟
واللي حواليه كانوا مغميين عينيه ؟
يعني إيه مغميين عينيه ؟! مكانش بيقرا جرايد ولا بيتفرج على تلفزيون
الراجل ده ماحفظش على كرامة المصريين عشان يحافظوا على كرامته 
ليست هناك تعليقات:
إرسال تعليق